Një ngjarje e pazakontë dhe plot mister ka tronditur Beogradin mbrëmjen e sotme. Avioni i kompanisë «Air Serbia» (fluturimi JU134), i cili ishte nisur nga aeroporti «Nikola Tesla» me destinacion Moskën, është urdhëruar të kthehet me urgjencë mbrapsht pasi kishte mbërritur tashmë pranë hapësirës ajrore në jug të Lituanisë.
Sipas të dhënave të radarëve të «Flightradar24», avioni i nisur në orën 18:48 u detyrua të bënte kthesën dhe u ul sërish në pistën e Beogradit rreth orës 22:00, zyrtarisht nën arsyetimin e «sigurisë».
Tre njerëzit e Moskës në bordin e fluturimit
Raportimet e medias së pavarur serbe Nova.rs tregojnë se brenda avionit ndodheshin figura të profilit të lartë politik pro-rus në Serbi:
Aleksandar Vulin, kreu i Lëvizjes së Socialistëve, ish-shef i shërbimit sekret BIA dhe një nga njerëzit më besnikë të Aleksandar Vuçiqit.
Dušan Bajatović, drejtori i «Srbijagas».
Nenad Popović, kreu i Partisë Popullore Serbe (SNP).
Të tre njihen hapur si linja më e fortë e Kremlinit në Serbi, gjë që ka ngritur dyshime të forta mbi një tentativë largimi të organizuar. Dyshimet u përforcuan nga një postim paralajmërues më herët gjatë ditës nga kreu i Partisë Demokratike, Srđan Milivojević, i cili pyeti publikisht në rrjetin X:
«E kush po ia mbath sonte për në Moskë me fluturimin e orës 18:30?»
Skandali në aeroport: Vulin hyri pa kontrolle sigurie
Sipas burimeve të Nova.rs, ngjarja thellohet edhe më shumë nga fakti se procedurat standarde të aeroportit nuk u zbatuan. Pamjet e kamerave të vëzhgimit tregojnë se Aleksandar Vulin nuk iu nënshtrua asnjë kontrolli të rregullt sigurie para se të futej në avion, duke lënë të kuptohet se ka pasur ndihmë nga brenda për të anashkaluar verifikimet.
Kush është Aleksandar Vulin?
Vulin, i cili ka drejtuar Ministrinë e Brendshme, atë të Mbrojtjes dhe shërbimin sekret BIA, është ndër figurat më të kontestuara:
Sanksionet nga SHBA: Më 11 korrik 2023, Thesari Amerikan e futi në listën e zezë për përfshirje në korrupsion, krim të organizuar, trafik narkotikësh dhe lehtësim të tregtisë së armëve për Slobodan Tešić.
Skandali i vilës: I njohur për arsyetimin ironik «tezja nga Kanadaja», me pretendimin se 205 mijë euro për blerjen e një banese i kishte marrë borxh nga familja e bashkëshortes.
Lidhja me shërbimet ruse: Akuzohet se i ka dorëzuar transkriptet e përgjimeve të opozitarëve rusë në Beograd këshilltarit të Putinit, Nikolai Patrushev, si dhe mbetet ideologu kryesor i konceptit nacionalist «srpski svet» (bota serbe).
Mbetet e paqartë se çfarë do të ndodhë pas kthimit të avionit në pistën e Beogradit dhe cili do të jetë reagimi zyrtar i autoriteteve shtetërore.
Publikuar:
