Ministria e Industrisë, Ndërmarrësisë, Tregtisë dhe Inovacionit ka nënshkruar një marrëveshje bashkëpunimi me Bankën Botërore për themelimin dhe zhvillimin e Eko-Parqeve Industriale në Kosovë. Projekti synon të forcojë kapacitetet prodhuese vendore, të nxisë investimet dhe të hapë vende të reja pune, duke integruar standardet më të larta mjedisore.
Kryeministri Albin Kurti theksoi se këto hapësira janë një instrument kyç për zbutjen e hendekut tregtar, pasi gjatë vitit 2025 importet e vendit arritën në rreth 7 miliardë euro kundrejt vetëm 1 miliard eurove eksportesh. Ai paralajmëroi se investimet do të shtrihen në të gjithë territorin, duke përfshirë ngritjen e dy parqeve në veri të vendit: “Pas vendosjes së rendit dhe ligjit në veri të Ibrit, po e zhvendosim gradualisht vëmendjen drejt zhvillimit ekonomik, krijimit të vendeve të punës dhe përmirësimit të jetës së qytetarëve që jetojnë atje”, u shpreh Kurti.
Ministrja Mimoza Kusari-Lila nënvizoi se eko-zonat sjellin një model të ri të zhvillimit të qëndrueshëm, ku efikasiteti i burimeve vlerësohet paralelisht me volumin e prodhimit. Ajo veçoi raportin e Korporatës Financiare Ndërkombëtare (IFC), i cili evidenton prodhimin e komponentëve të ndërtimit — si përpunimi i metaleve, mobilieve, materialeve izoluese dhe sistemeve të ngrohjes — si fusha me potencialin më të lartë ekonomik.
Nisma mori mbështetjen e Bashkimit Evropian dhe Bankës Botërore. Shefi i Bashkëpunimit të BE-së, Hubert Perr, e cilësoi hapin si një garanci për rritjen e konkurrueshmërisë, ndërsa menaxherja e Bankës Botërore, Carole Megevand, theksoi se projekti do të eliminojë pengesat në menaxhimin e energjisë, ujit dhe mbeturinave, duke fuqizuar markën "Made in Kosovo" në tregjet evropiane.
Publikuar:
