Zhvillim vendimtar në Kuvendin e Kosovës: Me 79 vota pro, asnjë kundër dhe asnjë abstenim, deputetët miratojnë mocionin procedural të PDK-së për futjen në rendin e ditës të Projektligjit për Dhomat e Specializuara – kjo pikë vendoset si e 11-ta dhe e fundit në seancën e sotme plenare
Kuvendi i Kosovës ka hapur zyrtarisht rrugën për shqyrtimin dhe votimin e Projektligjit për plotësim-ndryshimin e Ligjit për Dhomat e Specializuara dhe Zyrën e Prokurorit të Specializuar, duke e futur atë në rendin e ditës së seancës së sotme plenare.
Kërkesa erdhi përmes një mocioni procedural të propozuar nga deputetja e Partisë Demokratike të Kosovës (PDK) dhe ushtruesja e detyrës së kryetares së këtij subjekti, Vlora Çitaku. Nga gjithsej 84 deputetë të pranishëm në sallë në momentin e votimit, 79 votuan pro përfshirjes së këtij projektligji në rendin e ditës, ndërsa nuk pati asnjë votë kundër dhe asnjë abstenim.
Pas miratimit të këtij mocioni, shqyrtimi i Ligjit për Specialen u rendit si pika e 11-të dhe e fundit në rendin e ditës të seancës së sotme të Kuvendit.
Prapaskenat dhe rrjedha e procedurës në Kuvend:
Zhbllokimi pas deklaratës së Haxhiut: Pak para këtij votimi, kryeparlamentarja Albulena Haxhiu kishte deklaruar se ligji nuk figuronte në rendin e ditës të seancës, por mocioni procedural i iniciuar nga Vlora Çitaku siguroi shumicën e nevojshme të deputetëve për ta përfshirë atë me procedurë të shpejtuar.
Marrëveshja PDK – Vetëvendosje: Futja në rend dite vjen pas dakordimit të arritur mes PDK-së dhe Lëvizjes Vetëvendosje (LVV) që ligji të rivotohet sot me përmbajtjen e tij aktuale (të miratuar më 6 tetor), në mënyrë që të tejkalohet vetoja e presidentes Justina Shiroka-Pula me së paku 61 vota, e më pas të nisë një proces i ri për amendamentimin e tij.
Kthimi nga Presidenca: Projektligji i iniciuar nga PDK-ja ishte miratuar fillimisht në Kuvend më 6 tetor, por më 22 tetor presidentja Shiroka-Pula e kishte kthyer për rishqyrtim pas kërkesës zyrtare të vetë grupit parlamentar të PDK-së
Publikuar:
