Struktura e Posaçme Anti-Korrupsion (SPAK) ka zbardhur prova të reja tronditëse lidhur me pasuritë e fshehura të ish-zëvendëskryeministres Belinda Balluku, ku në qendër të dosjes hetimore qëndron një fotografi komprometuese: një kuti e kuqe e mbushur deng me tufa kartëmonedhash 50-euroshe, e shkrepur brenda vilës luksoze në kompleksin turistik në Dhërmi.
Sipas hetimeve të thelluara, fotografia daton më 17 korrik 2021 dhe është sekuestruar nga telefoni i Lavdrim Smones, bashkëshortit të pastrueses së shtëpisë së Ballukut në Tiranë.
Skema e fshehjes së pronës dhe përfshirja e administratës
Megjithëse vila në letër figuron e regjistruar nën emrin e ish-kapitenit të kombëtares, Igli Tare, SPAK ka administruar prova të forta që faktojnë se pronarja dhe përdoruesja reale ka qenë pikërisht Belinda Balluku:
Përgjimet dhe qindra komunikime: Nga viti 2018 deri në vitin 2025, prokurorët kanë analizuar qindra biseda telefonike mes shoferit personal të Ballukut, vartësve të saj, stafit të pastrimit dhe administratorëve të kompleksit në Dhërmi.
Shërbëtorët me transport zyrtar: Familja e pastrueses udhëtonte rregullisht drejt bregdetit të jugut për mirëmbajtjen e vilës, ndërsa udhëtimet koordinoheshin dhe realizoheshin drejtpërdrejt me automjetet dhe shoferin personal të ish-zv/kryeministres.
Arredimi sipas shijeve të Ballukut: Përgjimet zbulojnë se çdo investim, mobilim dhe modifikim në këtë pronë është bërë vetëm sipas porosive dhe preferencave të drejtpërdrejta të saj, teksa antenat celulare konfirmojnë praninë e saj të pandërprerë atje që prej vitit 2019.
Me vendim të Gjykatës së Posaçme, prona luksoze – me një sipërfaqe ndërtimi prej 103 metrash katrorë dhe mbi 300 metra katrorë truall – është vendosur tashmë nën sekuestro preventive, teksa hetimet e SPAK po thellohen mbi origjinën e parave cash të gjetura në kutinë e kuqe.
#LajmiIFundit #SPAK #BelindaBalluku #Dhermi #Korrupsion #DosjaBalluku #IgliTare #VilaNeDhermi #Drejtësi #QeshPakTV #Lajme
Publikuar:
