Deklaratë e fortë para nisjes së seancës plenare: Ish-presidentja e Kosovës, Vjosa Osmani, shpreh kundërshtimin e prerë ndaj nismave për ndryshimin e Ligjit për Gjykatën Speciale – sipas saj, këto iniciativa janë jokushtetuese, krijojnë pritje të rrejshme dhe rrezikojnë procesin e ankimimit për ish-udhëheqësit e UÇK-së në Apel
Para fillimit të seancës së sotme të Kuvendit të Kosovës, ish-presidentja Vjosa Osmani ka dalë me një qëndrim të qartë kundër iniciativave të fundit që prekin Ligjin për Gjykatën Speciale. Sipas Osmanit, Lidhja Demokratike e Kosovës (LDK) nuk mbështet nisma që nuk sjellin rezultate reale në mbrojtje të së vërtetës historike të vendit dhe luftës çlirimtare, por vetëm sa ushqejnë pritje të rrejshme te qytetarët.
Ajo ka kritikuar ashpër mungesën e angazhimit diplomatik dhe mediatik të krerëve shtetërorë dhe përfaqësuesve politikë në arenën ndërkombëtare gjatë dy muajve të fundit pas vendimit të shkallës së parë, duke vlerësuar se energjia e shtetit po devijohet në hapa që bien ndesh me Kushtetutën dhe obligimet ndërkombëtare të Kosovës.
„Në vend se e gjithë energjia e shtetit të fokusohet deri tani në mbrojtjen e kësaj të vërtete historike ndërkombëtarisht, ne e shohim se edhe pse kanë kaluar 2 muaj nga vendimi, nuk e kemi asnjë intervistë në media të rëndësishme ndërkombëtare ku para syve të botës do të mbrohej e vërteta historike e Kosovës. Ne nuk kemi asnjë prezentim, nga krerët shtetërorë apo përfaqësues të partive politike, sepse unë kam folur për këtë, por në vend se shteti të fokusohet në mbrojtje të kësaj të vërtete, ne kemi iniciativa që nuk janë në përputhje me kushtetutën, obligimet ndërkombëtare të Kosovës por e dëmtojnë kauzën e mbrojtjes së të vërtetës para procedurës në Apel dhe krerët e UÇK-së që duhet të mbrohen në Apel me argumente juridike“, deklaroi Osmani.
Pikat kryesore të deklaratës së Vjosa Osmanit:
Kritikat për linçimet publike ndaj LDK-së: Osmani theksoi se LDK-ja i ka shprehur qëndrimet e saj parimore lidhur me këtë çështje, por për këtë arsye, sipas saj, zyrtarët e partisë janë njollosur tejmase duke u vendosur emrat e tyre para atyre të Serbisë.
Mbrojtja e dyfishtë e historisë: Ajo nënvizoi se do të mbrojnë të vërtetën historike të Kosovës dhe luftën e UÇK-së, por njëkohësisht u shpreh se nuk i kërkojnë leje askujt për të mbrojtur dinjitetin e veprimtarëve të LDK-së dhe familjeve të tyre, të cilët, siç tha ajo, janë vrarë, torturuar dhe etiketuar si bashkëpunëtorë vetëm pse i qëndruan besnikë presidentit historik.
Binomi Rugova – Jashari: Sipas Osmanit, mbrojtja e së vërtetës së veprimtarëve të LDK-së dhe mbrojtja e luftës së UÇK-së nuk e përjashtojnë njëra-tjetrën, por janë plotësuese, ashtu sikurse ka qenë binomi mes presidentit historik Ibrahim Rugova dhe kryekomandantit Adem Jashari.
#VjosaOsmani #GjykataSpeciale #LDK #KuvendiIKosovës #UÇK #IbrahimRugova #AdemJashari #LigjiPërSpecialen #Politikë #Aktualitet #LajmiIFundit #Lajme
Publikuar:
